又大又細小籠包 @ 金牌小籠包

星期日可以話係全家總動員出動。。。只係為咗兩個小魔怪。一個1330至1845响九龍區綵排，但中間有1個多鐘嘅空檔要响學校接走佢，之後又返學校綵排。另一個就1530至1830响香港區有表演。一個東一個西，只好全家出動响唔同地方做接送嘅工作。

當日唔單止小朋友攰，連我哋大人都攰到爆。小朋友可能只係需要响台上表演3至5分鐘，但小朋友連大人都要响現場等3至5個鐘不等，等都等到攰啦！

响大家都已經攰爆嘅時候，大家都唔係好想諗夜晚餐飯食乜。最易諗到當然係屋企附近個商場裡面嘅食店啦！原本諗住去試商場裡面嘅一間泰國餐廳，因為未食過，同埋個環境都唔錯，好可惜爆咗要等位，但枱枱都係剛開始無耐，都唔知要等幾耐。咁攰嘅時候當然唔會去等啦，我哋就去咗隔離間金牌小籠包開餐。

以前都有幫襯過呢間食店，但今次再嚟，水準明顯差咗。

今次叫咗3款小籠包，但其中兩款我食完食唔到有咩分別囉，香辣。。。我完全食唔到有辣味。我諗係得小魔怪要嘅朱古力小籠包會有唔同，但朱古力配小籠包，我只覺得怪，只有小朋友會鍾意食。小魔怪仲好攪笑咁問咗我一句，點解啲小籠包一啲大一啲細嘅？係囉，點解呢？

 金牌小籠包

 香辣小籠包

 朱古力小籠包

呢一碟尖椒皮蛋，我唔食皮蛋，所以無試過味，但就睇到媽咪講咗句。。。又話尖椒皮蛋嘅，啲尖椒响邊呀？最好食嘅都應該係呢件紅燒豬手，但我無食到，因為好快被掃清咗

  

我哋每人叫咗個麵食，我嘅係麻醬撈麵，但唔好意思，個麻醬味唔係好夠，好淡。



Hmmmm。。。總括嚟講。。。唔得。