Breakfast @ Cafe Ceres

通常星期六、日都會同屋企一齊去食早餐，而多數亦都會係屋企附近嘅茶記。但呢一日突然心血來潮唔想食茶記，想食一個西式早餐。婉拒咗同屋企人一齊食早餐，跟住就搜索一下屋企附近有咩 cafe，終於搵到九龍城呢間 cafe 有我想食嘅早餐。

點解會揀呢間 cafe，因為佢除咗 All Day Breakfast 有我喜愛嘅茄汁豆外，另一款早餐 Ham & Cheese Croissant 都有茄汁豆。下午仲要去食 tea buffet，所以早餐一定唔可以食得太豐富。

我去到 cafe 原來剛好已經過咗早餐時間，但慶幸店員只係望一望個鐘，仍然肯幫我 order 我嘅 Ham & Cheese Croissant breakfast，飲品就要咗 Latte。

佢嘅 Croissant 係用咗飛碟嘅製法，所以出嚟嘅 Croissant 已經壓扁咗，但這樣有一個好處，就係 ham & cheese 可以完全溶合埋一齊，個味道就增加好味。雖然個牛角飽壓扁咗，但仍然可以食到佢嘅酥脆味道。

Latte 香濃順滑，咖啡上嘅兔仔拉花，望落去令人感覺好開心，令我好有衝動想去學拉花。

昌發泰國粉面屋

响澳洲居住嘅時候已經好鍾意食泰國湯粉，不論係商場嘅 food court，又或係 market，都會可以食到正宗嘅泰國湯粉。每次食泰國粉我都放好多好多調味粉，唔係因為碗粉唔夠味，而係泰國嘅調味粉特別好味。。。特別係辣粉！

某一晚同朋友响九龍城捐窿捐罅行街時發現咗呢間食店，一個好窄嘅店門，處於泰國雜貨店之間，一不留心都會行過咗。

一般嘅泰國菜都係來自南泰國，但這裡嘅就係來自北泰國。南泰國嘅湯粉係幼湯粉，而北泰國嘅湯粉係比較粗嘅，比我哋平時食嘅河粉還要粗。

每次到嚟，這碗冬蔭功湯粉必是我的首選，佢唔需要再落任何調味粉。因為這碗湯粉已經有大量辣粉在內，再落就恐怕食唔到喇！這碗湯粉可以話係越食越辣，但佢嘅湯底都仲係好清。

很一般的泰國菜 @ 昭拍耶

過往同這個朋友去九龍城泰國菜，我哋都會選擇去昌發，但因為已經去過好幾次，所以今次我提意去試其他泰國餐館，隨便揀嘅情況底下，嚟咗呢間昭拍耶。。。出事了！

我哋叫咗個二人套餐，再加多個生蝦刺身，同買一送一嘅兩杯飲品！

還記得第一次响九龍城食泰國菜，朋友點過呢味生蝦刺身令我一試難忘，所以每次去食泰國菜，我都會食！但今次嘅生蝦刺身令我有啲失望，蝦唔夠肥美，醬汁唔夠辣味。同埋出嚟個賣相都差咗少少，平時食嘅生蝦身刺身會有冰放底，但這碟啲冰唔見哂。

我要龍眼冰唔夠龍眼味，朋友嘅芒果沙冰同平時飲開嘅沙冰賣相好唔同，同埋沙冰個杯好唔襯。 

龍眼冰

芒果沙冰

黃咖喱豬超多配料，但無乜豬肉，同埋個咖喱無辣味

個通菜唔知係唔係落得太多麵鼓嘅關係，個菜汁變得好甜，無咗泰國菜嘅一般風味。

炸蝦餅感覺上個蝦肉實咗少少

串燒雞、牛、豬燒得略為乾身咗少少

小魔怪生日蛋糕 @ Gioia by Chi

九月係小魔怪嘅生日月，每年都會為佢哋準備生日蛋糕，今年亦不例外。之前媽咪生日嘅時候，試過 Gioia By Chi 嘅蛋糕，小魔怪都好鍾意食，所以今次都諗住嚟呢樹訂蛋糕。

兩個小魔怪，一個响10號，一個11號生日，雖然可以訂一個蛋糕兩姊妹一齊切，但總覺得每人一個蛋糕佢哋會開心啲。

Cake shop 嘅 signature cake Fresh Fruit Surprise 係不二之選，而倆姊妹都鍾意食朱古力，cake shop 就介紹咗款 Chocolate Fun 俾我。

Fresh Fruit Surprise 係拿破侖底，中間夾著吉士忌廉，蛋糕面就舖滿咗生果，當中仲有無花果添呀！個拿破侖底超脆，中間嘅吉士忌廉甜度剛剛好，唔好令人覺得太甜。真係食到個個都讚不絕口呀！



Chocolate Fun 用咗朱古力脆餅底，跟住就係一層朱古力海綿蛋糕，上面就係焦糖面。整個蛋糕嘅味道配撘恰到好處，唔好太甜或太漏。

充滿回憶嘅甜品舖 @ 小方糖

我同佢都好鍾意食嘢，我哋都唔介意舟車勞頓，長途跋涉去搵。我唔係一個大食嘅人，每次我食唔哂嘅嘢，佢都會肯幫我包底，但之後就會投訴我攪到佢肥咗。每次去街，最後嘅一個行程一定係去糖水甜食甜品。某幾個地區，我哋都會有間鐵腳嘅糖水店。。。荃灣會去松記，深水埗會去綠林甜品，九龍城就係今次介紹嘅小方糖。

已經有一段日子無嚟小方糖，今次再嚟發現佢嘅餐牌好似靚咗，細心再留意下，原來真係換咗餐牌，仲多咗幾款新糖水。真係唔嚟一排，又一番新景象。人可唔可以好似餐牌咁，將舊嘅掉去，換過一批新嘅，令人耳目一新呢？   平時我嚟小方糖，都會食楊枝金露，但今次揀咗佢鍾意食嘅風花雪，裡面有豆腐花、我喜愛嘅日本紅豆同意式涼粉，雪糕我揀咗 Cream n' Cookies，我覺得不論係視覺上或味覺上，呢款雪糕同個甜品係最夾架。。。根本係不二之選！



朋友選擇咗新推出嘅龍珠改，點解叫龍珠改，因為佢係龍珠版嘅改良版。龍珠改有雲呢拿沙冰、小丸子、新鮮龍眼肉同椰果。而原裝龍珠版，由雲呢拿沙冰轉咗係椰子沙冰，小丸子就變咗係珍珠。朋友仔話鍾意原裝版多啲，因為佢鍾意原裝版嘅椰子沙冰。  



另一朋友亦都係要新款嘅香蕉拿破侖，佢原本係想食榴槤拿破侖，可惜當日無得供應。我之前有食過佢嘅芒果拿破侖，一客四件嘅大大件拿破侖，做得非常鬆脆，拿破侖內仲有滿滿嘅芒果肉。其實你一入佢間甜品店，就會聞到佢哋焗緊拿破侖嘅香氣，簡直係香氣滿溢。  

 另一朋友因為唔食凍嘅甜品，所以選擇咗合桃露。佢中式糖水種類唔多，但都係做得唔錯。如果要係熱食甜品，我會揀佢嘅蛋花腐竹糖水，滿滿嘅薏米，再加上腐竹蛋花味，非常好食。   佢係我至愛糖水店之一，永遠難忘。

My Dessert @ 口甜舌滑

曾經有個人兄話我係甜聖，但其實我一啲都唔甜聖。我主要只會食濕嘅糖水，例如中式糖水，楊枝金露等等。蛋糕類嘅甜品係好少食，就算食都唔會食好多。吖，我好似食咩都鍾意食濕類嘅，湯麵、糖水等等。

我屋企小魔怪﹝我兩個姪女﹞個爹地响馬來西亞買咗雪條返嚟俾佢哋食，大魔怪話要食雪條，但我哋就提意出去九龍城食糖水。一般小朋友都會鍾意食甜品，小魔怪亦不例外。只要同佢哋講同佢哋去食糖水，佢哋就乜都肯應承你。

大魔怪指定要去食口甜舌滑，佢話仲好食過小方糖喎！好唔好食就見仁見智啦，咁當然亦都唔差。但佢鍾意去嘅最主要原因係口甜舌滑有清心丸食，小方糖佢就鍾意食心太軟，因為係朱古力嘛！但嫲嫲唔會俾佢成日食心太軟，所以佢就會選擇去口甜舌滑食清心丸。

佢叫嘅甜品都特別過人，人哋餐牌上只得清心丸綠豆爽，但佢偏偏要轉做綠豆沙清心丸，仲要加多三粒湯丸。。。肥鬼死佢呀！



我哋仲叫咗蒟蒻涼粉、什果撈、芒果布甸，同埋我嘅清心丸綠豆爽。

  



個綠豆爽我就覺得淡味咗少少，呢款糖水我比較鍾意响潮州合成糖水樹食喇，但可惜自從清心丸有問題之後，佢哋都無咗提供清心丸糖水喇！