首嚐咖啡弄

去年已經不斷有朋友去香港新開嘅咖啡弄，但每一個都要排上一個鐘或以上，這令我一再卻步。終於等到佢响尖沙咀開分店，又見到朋友話如果一個人去食，可以唔需要等咁耐就可以入座。

星期六下午就膽粗粗去試一試，但眼見條龍已經排到落樓下，等咗一陣都未見有前行嘅動靜，最後決定放棄，另找地方醫肚。

當然我唔會真係放棄啦，星期日我响佢未開店就去排隊，但去到時又係一條長龍，但都繼續堅持下去。到正式開店時間，一輪衝風入咗一大批人，但之後就再無動靜。開始聽到有人話要等一個半鐘先有得再入，亦有人相繼離去。當我懷着希望有奇蹟出現嘅時候，有餐廳職員問我幾位，之後就話我可以上樓入座。。。Yeah，成功了。

入座後，即時點咗我一早已睇中嘅食物，雖然好想食窩夫，但一個人真係食唔到咁多。所以只係要咗每日限定嘅玉米里肌起士可頌 （Corn Cheese Croissant Sandwich ）同埋冰柚桔茶。

份 croissant 真係超大份，而見到 croissant 上漏哂嘅芝士都真係有啲擔心，但慶幸佢嘅芝士味唔係太重。如果啲芝士太漏的話，真係怕自己會食唔哂。鬆軟嘅 croissant 夾住大大件嘅豬里肌、蕃茄、生菜，面層仲舖上脆脆嘅煙肉碎。好好食又未至於，但味道算不錯，可以一試

酸酸嘅冰柚桔茶，大約可以斟六小杯，絕對可以令大家開胃，繼續吃下去。

美人美食 @ Stanley Cave

之前見朋友响 Facebook 介紹這間於赤柱嘅麵包蛋糕店，佢不單麵包蛋糕店出店，連店內嘅店員都係俊男雲集。一直好想入去品嚐觀望一番，但赤柱對我嚟講不近也不遠，唔係時時會去嘅地方。

呢日就心血來潮，好想入去赤柱閒逛一番，順道去試下這間嘅麵包蛋糕。入到店內已經係人頭湧湧，店內嘅裝修比人嘅感覺真的有如置身於山洞一樣。店內嘅店內都可以話係俊男美女，而且每一個都面帶笑容，這些已經可以為佢哋美食加分。

這裡除咗麵包蛋糕外，仲有 salad, yogurt, crepes 等等比大家選擇

今次我就只係簡單咁 order 咗一件 mango cake 同一杯 coffee，因為接近聖誕嘅關係，佢哋嘅蛋糕都加咗少少聖誕嘅裝飾。蛋糕鬆軟唔太甜，如果芒果可以濃少少就更好喇！咖啡就真的好一般，沒太大特色，咖啡味亦不夠香濃。以我這些愛好咖啡者嚟講，可以話有少少失望。

Breakfast @ Cafe Ceres

通常星期六、日都會同屋企一齊去食早餐，而多數亦都會係屋企附近嘅茶記。但呢一日突然心血來潮唔想食茶記，想食一個西式早餐。婉拒咗同屋企人一齊食早餐，跟住就搜索一下屋企附近有咩 cafe，終於搵到九龍城呢間 cafe 有我想食嘅早餐。

點解會揀呢間 cafe，因為佢除咗 All Day Breakfast 有我喜愛嘅茄汁豆外，另一款早餐 Ham & Cheese Croissant 都有茄汁豆。下午仲要去食 tea buffet，所以早餐一定唔可以食得太豐富。

我去到 cafe 原來剛好已經過咗早餐時間，但慶幸店員只係望一望個鐘，仍然肯幫我 order 我嘅 Ham & Cheese Croissant breakfast，飲品就要咗 Latte。

佢嘅 Croissant 係用咗飛碟嘅製法，所以出嚟嘅 Croissant 已經壓扁咗，但這樣有一個好處，就係 ham & cheese 可以完全溶合埋一齊，個味道就增加好味。雖然個牛角飽壓扁咗，但仍然可以食到佢嘅酥脆味道。

Latte 香濃順滑，咖啡上嘅兔仔拉花，望落去令人感覺好開心，令我好有衝動想去學拉花。

宏

耐不耐就會到朋友响 facebook post 嚟呢到食嘢嘅相，令我好有衝動嚟試下。後來上 openrice 搵佢個地址，發覺原來佢初開舖嘅時候已經入去望過佢嘅蛋卷，因為間唔時都會隔離舖嘅松記食糖水，等位期間就會入去望一望。



呢日的起心肝要嚟食，但一個人其實又唔可以食到好多，所以一早安排咗當日只係食咗早餐，留待晚餐嚟試佢嘅蛋卷同芭菲。



晚飯時間又唔可能只係甜品，唔食正餐，所以要咗一個最簡單嘅撈烏冬。麵質都幾滑，唔錯。



之後當然係要食呢到嘅主打啦。。。抹茶蛋卷，抹茶忌廉都幾滑，同埋好香抺茶味，蛋卷亦好鬆軟。整個蛋卷唔太甜，唔會太漏，可以有空間俾我試埋下一個甜品。



最後叫埋佢另一主打嚟試。。。抹茶芭菲，頂層可麗餅插於抹茶雪糕上、再嚟抹茶糯米糍、吉士醬、抹茶啫喱、忌廉，最底層就係粟米片。食到抹茶啫喱那一層還可以，但到忌廉一部份已經有啲頂唔住，可能唔太好食忌廉，所以會感覺有少少漏嘅感覺。但奈何我又想食佢嘅粟米片，唯有盡量挑到最底去攞粟米片食。整杯芭菲最鍾意食就係抹茶雪糕、糯米糍同抹茶啫喱。

昌發泰國粉面屋

响澳洲居住嘅時候已經好鍾意食泰國湯粉，不論係商場嘅 food court，又或係 market，都會可以食到正宗嘅泰國湯粉。每次食泰國粉我都放好多好多調味粉，唔係因為碗粉唔夠味，而係泰國嘅調味粉特別好味。。。特別係辣粉！

某一晚同朋友响九龍城捐窿捐罅行街時發現咗呢間食店，一個好窄嘅店門，處於泰國雜貨店之間，一不留心都會行過咗。

一般嘅泰國菜都係來自南泰國，但這裡嘅就係來自北泰國。南泰國嘅湯粉係幼湯粉，而北泰國嘅湯粉係比較粗嘅，比我哋平時食嘅河粉還要粗。

每次到嚟，這碗冬蔭功湯粉必是我的首選，佢唔需要再落任何調味粉。因為這碗湯粉已經有大量辣粉在內，再落就恐怕食唔到喇！這碗湯粉可以話係越食越辣，但佢嘅湯底都仲係好清。

女仕定食 @ 誠寿司

公司搬咗嚟黃埔接近一年，最初對黃埔嘅感覺係雖然屬於九龍區，但有少少與世隔絕嘅感覺，可能因為這裡還未有地鐵吧！與世隔絕比人另一感覺就係無啖好食，特別係公司處於黃埔花園內嘅最盡處。

這裡知道較為出名嘅食店只有時新快餐店食漢堡飽，但無可能日日都食漢堡飽，同時由公司行出去亦要好一段距離。

呢一年間，好多時都會上 openrice 搜索下一啲較好評嘅食店去試，但絕大部分都要步行10至15分鐘。這日偶然發現這間處於黃埔區內嘅日本餐廳 -- 誠寿司，得到好多好評，所以就決定嚟試下。

佢哋有多款嘅中午套餐選擇，我就揀咗一款專為女仕之設嘅女仕定食，睇個名應該係為女仕之設啩！

個套餐都幾豐富，亦剛剛好係我嘅份量：
刺身：油金魚、甜蝦、三文魚
壽司：吞拿魚、帶子、蔥吞拿魚腩卷
日式蒸蛋，小砵，沙律，麵豉湯，迷你烏冬

刺身同壽司材料都非常新鮮，每一件刺身都係厚切刺身，而壽司飯握得剛好，唔會一夾即散，而佢嘅醋味不會太濃，搶去刺身嘅鮮味。

薄荷茶、薄荷咖啡都試得多，但第一次食薄荷葉做嘅天婦羅，薄薄的一片葉吃起來好特別。天婦羅炸得好香脆，但又唔會太油膩。

最後仲有一客紅客雪糕甜品，我就略為覺得紅豆味唔夠濃郁。

好食車仔麵 @ 麵麵店

我都幾鍾意食車仔麵，因為可以隨自己喜好揀唔同嘅餸菜，又唔需要局限食店所定嘅款式，餓就食多啲，飽嘅就食少啲。

自從朋友介紹過呢間車仔麵店之後，每次嚟親佐敦，我就不其然想嚟食。$40 - 四餸車仔麵加送一杯飲品，呢個價錢一啲都唔貴。佢每款餸絕對唔係只得一、兩件，$40大大碗，個湯底又好味，無味精！

今次叫咗豬腸、黑木耳、酸齋、牛肺，豬腸清理得好乾淨，無任何異味

黑木耳有好豐富嘅鈣同鐵嘅營養素，有活血補血嘅功效，對於我呢啲高度貧血者嚟講，就最啱食喇！

除咗灣仔嘅車仔麵之家，這裡嘅酸齋亦都唔錯，酸度適中，同埋呢度嘅酸齋係比較硬身

原本係叫沙葛餃，可惜無哂，急趕之間就隨意地點咗牛肺，佢嘅牛肺好厚身，唔似其他店嘅薄切切



飲品可以選擇豆漿或山楂冰，呢個山楂冰帶微酸，可以幫我開下胃，好濃嘅山楂味，簡直係消暑恩物。

山楂冰

全天候早餐 @ Cafe Corridor

有一日突然期間心血來潮想食 All Day Breakfast，我就係一個咁嘅人，好多時都會忽發其想，想做某啲嘢，如果做唔到就會好唔安樂，肯定無得安樂死！

當日要出銅鑼灣攪私務，所以一早就不斷搜尋銅鑼灣邊樹有好味嘅 All Day Breakfast 食，最後都係選擇咗去慣去熟嘅 Cafe Corridor。平時嚟呢樹主要係飲咖啡，未試過食佢嘅嘢，今次就即管試下啦！

All Day Breakfast 一上枱，最吸引我嘅就係個薯餅，用茄汁畫上一個兔形圖案，好得意呀，感覺上可以將悶悶嘅心情消除不少。就我現場所見，每份嘅 All Day Breakfast 薯餅都係畫上唔同嘅圖案，絕對唔係一式一樣架！炒蛋非常嫩滑，感覺剛剛好，唔會太乾，保持住少少濕潤。如果可以將麵包改為我喜愛嘅多士方包，同埋再加上我嘅至愛茄汁豆，咁就 very good 喇！



另外 order 咗一杯 Latte，香濃嘅咖啡香為這一餐畫一個完美句號！

大閘蟹粉魚子醬醋牛角三文治 @ Urban Bakery

早前得知 Urban Bakery 由今日開始發售預訂嘅大閘蟹 croissant，作為大閘蟹痴嘅我當然好想試下啦！即時 message 咗去落 order，响國慶日食個大閘蟹牛角三文治慶祝下。

當去攞 order 嘅時間，師傅為我即時製作這個牛角三文治，將大閘蟹粉作饀料放入crossiant 內，再放上魚子醬响面，製成品就出現响眼前喇！

大家都已經習慣咗所有食物上枱，都係相機、電話先食外表，再到人去試內在！所以付款時，職員都很細心問需唔需要影相，當完成製成品後，佢哋會將 crossiant 放上櫃台讓你影個近照，之後先放入盒給你帶走。

 

 

Urban 嘅 crossiant 不用多說，外表鬆脆，可能用咗大閘蟹粉做饀料，所以唔會覺太重嘅牛油味。至於大閘蟹粉饀料，唔知係唔係大閘蟹仍然未到時候，我唔係太食得出大閘蟹嘅味道，當然大家亦不防一試。

 

如果大家想試的話，記得要預早2日前要訂，佢哋每日限量發售10個架咋！

隱蔽的小店 @ Squirrel Coffee and Kitchen

一個人晚餐，你會選擇食咩？呢一晚又到勝利道，原本諗住去食好味 hot dog 做晚餐，上openrice check 過，佢係開到八點，所以今晚一放工即時趕過，希望唔會摸門釘啦！離遠見到門仍然開著，滿心歡喜諗住今次終於可以食到，點知行近一望，門口掛著一條橫繩，掛著休息牌。又無得食喇，我諗真係要星期六或日過先可以幫襯到！

失望之中，仍然要考慮今晚可以食咩晚餐，突然想起有一間餐廳一直想去試，睇住佢何文田開業到而家，都一直未有呢個機會，今晚終於可以一試喇！ 入到餐廳內先發現原來佢有 dinner set 提供，但因為唔想食得太飽關係，我只係 order 一個意粉同咖啡。



香辣海鮮扁意粉 Spicy Seafood Linguine ~~ 佢嘅辣主要係嚟自黑胡椒，對我嚟講唔算係好 spicy，但就帶出咗整碟意粉嘅味道。意粉嘅韌度適中，唔會過林，而海鮮亦可食出佢嘅鮮味！



Double Espresso ~~ 自從澳門之旅後，開始愛上咗飲 Espresso，無任何其他嘅添加，完全可以飲出咖啡嘅香味！

滷水鴨飯 @ 生記滷味

有幾多個人會好似我咁唔鐘意撘港鐵，不論佢係有幾直接，或者路程時間係有幾咁快，都另願提早半個鐘，甚至乎一個鐘頭時間出門口去撘路面交通工具呢？我就係一個咁嘅人。我係好抗拒撘港鐵，每次去街，我都只會諗路面嘅交通工具，除非真係無辦法之下一定要坐。所以我一個月都未必撘到5次港鐵。

唔鐘意撘港鐵嘅原因，係因為佢太多嘅上上落落，永遠絕大部分時間都係响一個漆黑一片嘅隧道裡面。我唔鍾意响隧道嘅感覺，唔鍾意响地底嘅感覺。我鍾意坐路面嘅車，隨時可以望到窗外嘅風景，雖然可能大部分時間都係低頭㩒住部電話，但總有抬頭嘅一刻，欣賞窗外嘅人和物。

咁你又有無試過當架車經過某些食店嘅時候，就會諗搵日嚟呢樹食吓先！我好多時都會係咁，經過某些食店，我會想去食下；經過某些咖啡室，我會想去試飲佢嘅咖啡。我就好似係一個無時無刻諗住食嘢嘅人，今次都唔例外。

自從搬嚟紅磡工作之後，回家嘅路上都會經過呢間滷水鴨店，好多時都諗幾時可以嚟試下。雞、鴨、鵝我最唔食嘅係雞，鴨、鵝都喜愛，都係果句。。。澳洲食咗太多家鄉雞，食悶咗！之前幾日已經諗住嚟食晏，但奈何每日都好鬼大雨，呢樹嚟我公司又唔算近，所以終於等到今日出太陽可以過嚟食。

一碟滷水鵝飯，跟例湯一碗，我一路食，一路抹汗。唔知係因為行到好熱嘅關係，定係隻鵝瘦得淨，好似無想像中咁好食。後來見到坐我對面個伯伯好叻，叫咗碟淨鵝片，我就知我出咗咩事。我應該叫鵝片飯，唔應該叫滷水鵝飯，啖啖肉先好味架嘛！下次再去一定會叫鵝片飯。

 

未能滿足的 Buffet Lunch @ Harbour Grand Kowloon

好少 lunch time 會選擇食 buffet，個人認為 buffet 係應該慢慢食、慢慢嘆先開心。要响一個鐘頭內去食哂鍾意嘅美食，仲要俾時間自己出出入入去選擇，真係有啲難度。

今次因為同鬼佬同事 farewell，而佢又係一個素食者，為咗方便佢有多啲食物選擇，所以我哋今次揀咗食 buffet。去到嘅時候，見到個場竟然 full house，無 book 位都唔使旨意有得食呀！嚟遠望過去食物 bar 枱，仲有我喜愛嘅生蠔，對佢嘅食物不禁開始有啲期望。

一開始當然先食我喜愛嘅冷盤海鮮啦。。。但有啲失望，個蠔還可以，但個蝦。。。唔係太新鮮！

之後再去攞咗碟刺身。。。見到碟刺身，我已經再提不起勁去影相喇！唔知係師傅把刀唔夠鋒利嘅關係定係咩原因，件吞拿魚切到有啲一岩一蠶咁，望落已經覺得唔美觀。點知食落仲差，啲刺身好似有根咁，好難先咬得開。。。真係未食過酒店啲刺身會係咁。

之後較好食嘅係印度咖哩雞，但個飯就偏乾咗少少，但有咖哩汁伴埋一齊食都可以接受。

之後再去食牛肉湯粉，見到有一大盤乾辣椒。。。正！但點解個盤嘅位置放得咁差嘅？個食物 bar 枱係有兩層好似樓梯嘅格式，辣椒就放响上層，下層放滿食物之餘，仲放咗一系列嘅醬汁响外圍，辣椒盤隻匙嗰柄又拎咗响裡面。雖然我唔算高，但都唔叫婑囉，隻手都唔係短，但我都係緊緊掂到個辣椒盤，將隻匙轉返出來。。。仲要驚件衫掂到下層嘅醬汁，要先將佢哋推前一下，以防萬一。到底邊個安排啲嘢咁放架？

我放咗一大匙嘅辣椒落碗湯粉樹，同事都驚太辣我會食唔到。我食完真係成身汗，但唔係因為碗嘢辣，係因為熱囉，我仲要著住件外套嚟食。碗嘢係一啲辣味都欠奉，都唔知係啲咩辣椒。

最後係甜品，我唔太好食甜品，因為唔太好食甜嘅嘢，少少甜已經覺好甜。。。但佢啲甜品一啲都唔甜，係食唔到有咩味！

如無必要，我應該唔會嚟第二次！

海南雞飯 @ 勝利小廚

如果星期五晚無約的話，我都會去窩打老道培正小學睇我個甜心姪女學游水。當我每次响無預先通告之下出現，佢都會超級開心。所以每次我都會話約咗人食飯，唔返屋企，就算連嫲嫲都要瞞騙，因為試過好幾次叫嫲嫲唔好講俾姪女知，佢每次都會口疏講咗。。。老人家係唔係因為開始甩牙，都會特別口疏嘅呢？唔單止排牙疏咗，連秘密都保守唔到。

何文田窩打老道一帶看似住宅區，唔太多食店，但其實貴精不貴多。雖然佢食店唔多，但其實果樹係有幾間出名、或歷史悠久嘅小店，佢哋全都聚集係同一條街 --- 勝利道。我最鍾意食有邊間？點止一間咁少吖。。。熱狗店、日本麵店、點心店，仲有我今次介紹嘅呢間。。。勝利小廚！

呢間食店最出名係咩？其實有幾款，但我最常食嘅係海南雞，我絕多數係會叫海南雞金邊粉﹝因為我鍾意食湯粉嘛，同埋飯嘅份量對我嚟講太多，唔係好食得哂﹞。但既然要介紹美食俾大家，我今次都破例叫咗海南雞飯。呢碟飯$50有找，我食過都好幾間食店嘅海南雞飯，佢嘅味道相比一啲價錢貴嘅食店有過之而無不及。佢個黃油飯唔會太油，亦唔會太乾，味道剛剛好。個雞絕大部份位置都去哂骨，真係可以用啖啖肉嚟形容。我最鍾意點橙色個汁，酸酸辣辣好開胃，我今次試過混合兩個汁一齊點，又都幾好味喎。

呢間食店除咗海南雞飯出名，多人食外，仲有泰國滷水鴨肉，泰式滷豬脾都好多人食。曾經試過一班人嚟食晚飯，點過佢嘅小炒，都好好味。可以話係，樣樣出色。　

意粉午餐 @ 紅磡意蠔屋

已經被困公司叫外賣整整一個星期，我實在已經頂唔順。我係一個鍾意食不同食物嘅人，實在唔可能一星期裡面都食住某一、兩間食店，雖然佢可能有好多選擇比我。响呢個仍然懸掛3號風球嘅下午，我終於要出走公司，向外覓食。

我並唔介意一個人出走去覓食，因為我可以隨自己意願去選擇地點、食店或者食物，不用有任何顧慮。慶幸午飯時段並沒有太大嘅風雨，步行咗大約15分鐘，終於嚟到呢間食意粉嘅小店。佢真係好細，只可以容納到16個位，每次嚟到都要排隊等位，好彩一人位又唔使等太耐。

佢嘅意粉有一個賣點，就係你可以選擇你鍾意嘅餸，意粉類別同埋個汁，完全 all with your favorite。佢一共有24款餸，7款意粉，9款汁，實有一款會啱你。

今次我就選擇咗煙鴨胸、粟米芯天使麵跟黑椒汁。整體個意粉係唔錯，唯一係個黑椒汁就偏鹹咗少少，可能我始終唔慣太重口味啦，上次叫嘅蕃茄辣汁就剛剛好喇！

除咗佢嘅意粉唔錯之外，跟餐嘅咖啡都好好飲。佢唔係一般茶餐廳嘅咖啡，係即磨咖啡。雖然係凍飲，但仍然有好濃嘅咖啡味，好多時凍咖啡個啡味會被啲冰沖淡咗，但佢就無呢個問題！

朱古力雪糕 @ Godiva

本身不太好食朱古力，不論係一粒粒嘅朱古力，又或是其他朱古力制成食物。

但最近不斷响 Facebook 見到身邊嘅朋友都去食佢嘅雪糕，個個都滿口稱讚。

羊群心理，兼餵食鬼作祟，經過响間專門店，忍唔住都要入去買個scone嚟試下

$39 一個球，真係唔算貴，話哂佢都係朱古力專門店吖！

食落...丫....雖然我唔好食朱古力，但呢個朱古力雪糕又真係唔錯喎！

好滑嘅雪糕，好香嘅朱古力味....下次一定要帶霖霖嚟食，佢　

兒時的漢堡麭 @ 時新

當日公司話搬去紅磡時，我第一樣諗到嘅好處就係可以去時新食漢堡麭。

初搬去嘅時候，仲可以食到佢嘅早餐，但由舊年年尾開始，佢嘅營業時間就改為11時開始，無得再嚟食早餐嚕

呢樹地方唔算寬敞，但佢有以前細個時快餐店嘅感覺。之前佢仲未有收銀枱時，我哋就正接响 bar枱落單，之後仲要聽清楚佢叫嘅 order 係唔係自己嘅，如果唔係，隨時攞錯人哋份餐。

今時今日，已經有個阿姐坐收銀位落單，仲要落單後，資料直接 send 咗去 bar 枱，客人只需留意顯示板嘅號碼去攞餐就可以。

佢個麭有3個汁選擇，黑椒、茄汁、沙律，我每次都係揀黑椒，因為鍾意辣嘛！

佢個麭加入哂味嘅漢堡同隻蛋連埋個黑椒汁....回味無窮

仲有佢嘅 luen luen 薯條，我食整個麭先再食，佢都唔會林....唔似某間連鎖快餐店，唔使一分鐘已經林哂，入唔到口！