雖然10多歲已移民外國，但對於觀塘嘅工廠區一啲都唔陌生，因為我爸爸响香港時工作嘅地方正正是觀塘工廠區。
當年每逢學校放假嘅日子，爸爸都會帶我同哥哥一齊跟佢一齊返工（我哋去到當然只係玩，唔係要開工啦）。返工前，我哋都會先去茶記食個早餐，午餐就會同爸爸嘅工友一齊去飲茶。
回望以前嘅觀塘同而家有好大差別，而家有部份嘅工廠大廈已經拆咗變成商業大廈。而工廠大廈內嘅單位，都未必真係一間工廠。以前嘅工廠大廈內唔會搵到有食肆，但今日你已經搵到林林總總嘅食肆响工廠大廈內開業。
呢一日我哋一班食友就相約咗去觀塘工業大廈內開業嘅一間家庭式私房菜食晚飯。雖然處身於工廠大廈內，但這裡的布置給人一種悠閒嘅感覺，令人不其然地想放慢步伐。
响這個炎炎夏日，先嚟一個不含味精嘅老火湯佛手瓜淮山薏仁湯，這個佛手瓜絕對有解熱作用。
跟住就係重頭戲火焰蝦，先用玫瑰露酒浸大約五分鐘，之後就直接响碗內點火。不斷將蝦於碗翻滾，直至火種熄滅。這個火焰蝦一上枱，就聞到好香嘅酒味，蝦肉燒得恰到好處，而佢嘅酒味亦都唔重 (可能因為我都算係飲得之人，所以唔係好覺酒味)。但蝦頭就吸盡咗酒嘅精華，啲酒味完全隱藏咗响蝦頭內，只要將蝦頭吸吮一下，酒味即時灌入口腔之中。
八一0四秘製蜜汁叉燒用上本地豬肉，並無加任何色素，所以看上去可能並不特出。佢嘅味道同一般嘅叉燒味道好唔同，絕對會令你食完一件又一件。
初見到這味稻草屈豬骨有啲擔心，因為見到佢有一層厚厚嘅肥肉，我並唔係唔食肥肉，但肥肉通常都給人油膩嘅感覺。但這層入口就做到油而不膩，而肉質亦夠腍。佢唯一不好就係那些稻草同豬肉抖纏响一齊，好難先可以將佢哋分割開。
茶燻雞選用咗嘉美雞，蘋果木做茶燻。雞皮脆而肉質鮮嫩，就算係雞胸部位都非常嫩口。
南乳炆齋無一般嘅重南乳味道，味道上係恰到好處，而腐竹亦係選用咗出名嘅樹記腐竹。
白玉葡萄絕對係手作食物，葡萄內還要釀入木耳，誠意之作。這個白玉葡萄如果能夠再煮林少少就更好喇，現在稍為太過爽口了。
香蒸荷葉飯放入大量蝦乾蒸製，每啖飯都可以食到蝦乾嘅味道，如果飯粒能夠再乾身就更完美喇！
沒有留言:
張貼留言