KC飯局 @ 利舞台翠亨邨

今晚參加咗响翠亨邨攪嘅 KC 飯局，翠亨邨這間食店給我帶來很多回憶。

還記得未移民去澳洲前，不論係我屋企人，或我哥哥嘅契媽都好鍾意帶我哋去翠亨邨飲茶。

第一次返嚟香港旅行時，契媽都係約我去翠亨邨飲茶聚舊，我仲記得係美麗華商場嗰間。

今次係去利舞台新開嘅翠亨邨，同我印象中相比嘅美麗華店當然係靚好多啦！



今晚嘅飯局連餐前小食、炒粉麵飯及甜品，總共有15味之多，真係食到我抱住個肚腩走。

先嚟兩小碟 - XO醬海蜇花  麻醬鮮淮山

以前只係試過食媽咪煲完湯嘅淮山，自從試過攞淮山嚟打邊爐之後，發覺原來新鮮淮山係好好味架

  

蜜汁叉燒 - 不單止件叉燒好味，連啲豆豆都好好味，但因為要留肚食之後嘅食物，我只敢食兩件咋

  

錦鏽玉鴛鴦 - 最愛食佢嘅合桃同埋油炸鬼，有人話我唔鍾意食炸鬼，要幫我食咁啲喎

雖然今晚屋企都留咗靚湯俾我飲，但呢碗五指毛桃合掌瓜又點可以唔飲呢，完全係老火靚湯，好想飲多碗。其實湯真係唔怕飲得多，特別係女仕，不論你有無愛情滋潤，但都一定要有湯水嘅滋潤

我嘅至愛終於出場喇 - 片皮鴨，無得講。。。。正，塊皮超脆囉

     

呢味菜好特別，不單止外觀特別，連個菜名都好特別 - 鍋貼牛奶併均安魚餅...佢特別得嚟又幾好味喎！特別係個鍋貼牛奶，上林下脆...掂！

客家炸釀大腸 - 未上枱都無諗過原來係咁嘅樣，我又諗錯咗添...我略為覺得條腸鬆咗少少，再扎緊啲條腸就好喇

Ummmm....頭抽白鱸魚球....Ummmm....即係呢鍾意食魚嘅人應該會覺得好好食，但奈何我只愛食刺身....Sorry!!!

任何一餐飯或任何一個國籍嘅餸菜，都一定不可少嘅蔬菜....呢個我 buy，我好鍾意食菜，同我主人好唔同，佢唔鍾意食嘅蔬菜，我絕對願意幫佢 KO 佢

竹笙羅漢上素

  

唔知點解肉類方面，我比較少食雞，可能响澳洲食得太多家鄉雞嘅關係

中式飯局，少不免嘅炒粉麵飯，但個飯有啲特別，係鴛鴦泡飯，並不是一般嘅炒飯。我本身唔係太重口味，所以我略為覺得佢重口味咗少少，醎咗少少

 

    

最後一味係令全場起哄、嘩然嘅甜品，好可愛嘅紫薯豬仔包。我鍾意食紫薯包多過蓮蓉包，個人覺得蓮蓉太甜、太漏，當食完一頓飯之後，再俾你一個蓮蓉包，我真係食唔落囉！但紫薯唔會太甜，味道剛剛好，食完一餐飯，都仲可以有位置放下呢隻豬仔包。