笑談歡聚 @ 沙田18

8 號風球後的星期日，陰天的日子，但帶著舒暢嘅心情到大學站。人生第一次踏足大學站，每次只係會坐港鐵經過，但從未踏足過呢樹。呢樹原來除咗有大學之後，仲有一間五星級酒店 ---- Hyatt Regency。

每一次嘅試菜都係响歡笑同美食中渡過，今次都唔例外。今次嚟 Hyatt 嘅中菜餐沙田18試菜，又一次開心暢懷咁去試食。

 

每次食中餐，枱上都會放著一啲小吃俾大家咀嚼一下。我好鍾意食呢啲小吃，因為通常都係一啲脆卜卜、辣或者酸嘅食物。
 

先嚟一個蜜汁叉燒，可能剛食過尖沙咀 Hyatt 凱悅軒嘅蜜汁叉燒，兩個相比之後，尖咀嘅就顯得比較優勝。



兩味開胃小食涼拌，話梅蓮霧同埋櫻桃蘿蔔黑米醋。呢兩味我超喜愛，因為蓮霧、蘿蔔都係我喜愛嘅蔬果，今次仲可以試一啲另類嘅食法。呢兩道開胃小食，絕對可以令我食到更多之後嘅美食。

 

中菜館當然唔少得佢哋嘅出名點心啦。。。客家茶粿、鱈魚春卷。茶粿同我哋平時食嘅傳統茶粿有些分別，佢個皮有啲似水晶麭，個人都係比較鍾意食傳統嘅茶粿多啲。

 

第一次見北京填鴨分三種不同嘅片法，片出肉同皮嘅配撘。胸皮，只需要蘸上砂糖嚟食，唔需要加其他配料同餅皮；淨胸肉，配京蔥、青瓜同餅皮一齊食，可以完全食到鴨嘅肉香；皮連胸脾肉，配京蔥、青瓜同餅皮一齊食，我比較鍾意呢種食法，有皮又有肉，有皮嘅香味又有肉嘅口感。

 

 

豉香蒸鮮膏蟹砵，蟹膏絕對係我嘅至愛。每次見到蟹膏
，我都會拼命三郎咁去食。我真係太愛食膏喇，但這個蟹就鹹咗少少。



蝦膏青芒蒸帶子，帶子鮮甜配襯住微酸嘅青芒絕對美味。



蜜餞柑桔海蝦，肥美嘅海蝦完全入哂味。一隻蝦已經可以令我飽哂肚。

 最後當然唔少得甜品啦。。。栗子薄餅卷，喜愛栗子嘅我，對呢味甜品當然唔抗拒。甜度適中嘅栗子，帶住微溫嘅薄餅，我相信將佢轉成一個冷點會更好味。

我哋之後再加碼叫咗佢哋嘅特色雪葩：清補涼、五粮液朱古力、花鵰話梅。五粮液嘅酒味係最濃，如果係唔鍾意太濃酒味的話，可以選擇花鵰話梅，花鵰味較輕，而話梅味會較重。我就兩個都咁 like。

 

試菜後，我仲外帶咗佢哋出名嘅蘋果批俾小魔怪食。餅盒一開已經可以聞到好香嘅酥皮味，連我媽咪都話好味呀！