意粉午餐 @ 紅磡意蠔屋

已經被困公司叫外賣整整一個星期，我實在已經頂唔順。我係一個鍾意食不同食物嘅人，實在唔可能一星期裡面都食住某一、兩間食店，雖然佢可能有好多選擇比我。响呢個仍然懸掛3號風球嘅下午，我終於要出走公司，向外覓食。

我並唔介意一個人出走去覓食，因為我可以隨自己意願去選擇地點、食店或者食物，不用有任何顧慮。慶幸午飯時段並沒有太大嘅風雨，步行咗大約15分鐘，終於嚟到呢間食意粉嘅小店。佢真係好細，只可以容納到16個位，每次嚟到都要排隊等位，好彩一人位又唔使等太耐。

佢嘅意粉有一個賣點，就係你可以選擇你鍾意嘅餸，意粉類別同埋個汁，完全 all with your favorite。佢一共有24款餸，7款意粉，9款汁，實有一款會啱你。

今次我就選擇咗煙鴨胸、粟米芯天使麵跟黑椒汁。整體個意粉係唔錯，唯一係個黑椒汁就偏鹹咗少少，可能我始終唔慣太重口味啦，上次叫嘅蕃茄辣汁就剛剛好喇！

除咗佢嘅意粉唔錯之外，跟餐嘅咖啡都好好飲。佢唔係一般茶餐廳嘅咖啡，係即磨咖啡。雖然係凍飲，但仍然有好濃嘅咖啡味，好多時凍咖啡個啡味會被啲冰沖淡咗，但佢就無呢個問題！