澳門外飲篇一 @ Terra Coffee House

响澳洲居住嘅時候完全地中咗咖啡癮，試過有一日因為遲咗飲咖啡，不斷咁打呵欠，直至飲咗一啖咖啡先停止。個一刻我就知我咖啡癮嘅嚴重性，所以我回香港第一件事就係戒掉咖啡。

雖然我曾經有嚴重嘅咖啡癮，但從來咖啡都唔可能令我瞓唔到覺，反而可能令我瞓得更得林。話說响澳洲生活無咩好做，最大嘅娛樂就係煲錄影帶。睇到某一個劇集話齋啡可以好提神，我就問我爸爸係唔係。我阿爸話係，仲話沖比我飲（當時已經係夜晚九點左右），我當然話好啦。。。因為我當晚正想通宵煲劇。誰不知飲完杯咖啡，我未到11點已經瞓著咗（我當時係未有任何咖啡癮架）。但我爸爸就話，佢成晚眼光光，飲咗咖啡湯。

我返到香港真的成功戒掉咗咖啡癮，但仍會時不時去買杯咖啡飲，始終咖啡嘅香味係難以令人忘懷！特別去到外地，我覺得去到當地嘅咖啡店，飲一杯咖啡、食一件蛋糕，係一件好優哉游哉嘅事。亦只有曾經咁做過，先覺得真的有旅行嘅感覺。

澳門係少有這類西式嘅 Coffee Shop，這是少數嘅一間。去到澳門試菜，中間有兩小時空檔，就去這裡試一下它的咖啡。

通常嚟呢類 Coffee Shop，我都必定會飲熱咖啡，因為熱咖啡可以完全帶出咖啡嘅香味，而咖啡味亦係最濃。所以就算已經行到幾熱，我都點咗一杯熱嘅 Bailey Latte。我成日都覺得不論將 Bailey 加入任何一種咖啡飲品，都會係一個絕配！這杯當然亦不例外啦，Bailey 嘅酒味不重，但就帶出咗好香嘅咖啡味。



朋友 order 咗一杯 Iced Coffee，但想不到雖然係一杯凍咖啡，但仍然可以飲得出濃濃嘅咖啡味。呢一杯 Iced Coffee 絕對可以飲得出師傅嘅工夫。



呢杯 Caramel Latte Shakerato 層次分明，完全係師傅嘅誠意之作。



好開心見到澳門有一間咁有水準嘅 Coffee Shop。