先不論早餐嘅味道，只係比較食物嘅款色，Nikko 可以話係嬴哂。Nikko 嘅早餐款色，我最少要用兩日時間先可以試哂，但其實已經只限於我鍾意嘅食物，一啲我不大感興趣嘅已經無計算在內。但 Hilton 嘅早餐，我可以話第一日已經唔知想食啲乜！
可能因為 Nikko 相對地比較多日本人入住，而日本人對食物始終係比較講究，所以食物款式亦相對地較多。而 Hilton 入住人客嘅對象主要係入迪士尼玩樂嘅遊客，所以食物並唔係佢哋吸引人客嘅元素。
但對於我這個鍾意食嘅人嚟講，食物嘅款式同味道係好重要。特別係佢係一個 breakfast buffet，buffet 又點可以唔多款式比客人揀呢！正所謂珠玉在前，這日嘅早餐實在不能令我提起勁去食，所以只係隨隨便便咁食。
呢日嘅主要行程就係遊樂迪士尼，真係可以用台上一分鐘，台下十年功嚟形容，不過字眼上要改一改。。。就係排隊一個鐘，玩就一分鐘。响迪士尼玩得最多嘅就係排隊，全日可能排超過六小時，但玩就唔知玩唔玩到一小時。但其實嚟得迪士尼都預咗，無辦法啦，小朋友鍾意嘛，排幾耐都要架啦！
整個迪士尼可以用人海嚟形容，但慶幸嘅係每一個人都好守規矩，並無爭先打尖嘅情況出現。玩遊戲要排隊，食飯都要排隊。我哋已經安排到差不多兩點先去食飯，但都係仲要排長龍。始終我哋人多，唔可能去食 fast food，食 fast food 只有更難搵位。
我哋嚟咗呢間 Hokusai 餐廳覓食，小朋友當然係食兒童餐啦，大朋友就自己各自選擇。日本迪士尼嘅兒童餐可以話一定食得飽，因為就算唔食其他，只係食佢嘅兩個吞拿魚飯團，已經夠哂飽。更可況仲有腸仔、漢堡肉同埋薯仔沙律。我姪女最鍾意嘅就一定係米奇形狀嘅啫喱啦！
我就選擇咗食 Tempura 冷烏冬，佢除咗有冷烏冬外，仲有一個冷麵同飯，對我嚟講絕對係足夠有餘。雖然係迪士尼內嘅餐廳，但食物質素一啲都唔差，始終係處於日本， tempura 嘅炸粉份量剛剛好，唔會太多。
佢嘅甜品賣相亦非常吸引，所以我哋都 order 咗兩款雪糕甜品，我最鍾意食嘅並唔係佢嘅雪糕，而係加咗麻薯粉嘅紅豆，煙煙韌韌好好食。
食完個午餐實在係唔想郁，我哋就氹咗班小朋友返酒店休息，夜晚再入過嚟玩。返酒店休息咗一陣，我哋又去咗幕張 outlet 掃貨，今次我就無再睇自己嘢，主要係睇吓有無手信可以買到。總算無白費腳骨力，响樹買到其中一份手信。
夜晚嘅迪士尼又一番景象，人生第一騎膊馬就响呢樹發生。唔係我騎人，係人騎我。我哋較遲入場嘅闗係，站得比較後，小朋友都唔夠高睇巡遊表演，而我哋只得三位男仕，但小朋友就有五個。三個小朋友已經騎咗膊馬。我見最細嗰個小女孩好無奈咁拉住爸爸衫尾，但又唔夠高睇。見佢咁慘，我就自告奮勇，俾佢騎我膊馬睇巡遊啦！佢已經係最輕磅嘅一個，但騎完後，我條頸都有少少緊咗。
玩到直至迪士尼關門，返到酒店已經過咗 last order 嘅時間，唯有捱住攰再出幕張搵嘢食啦！出到去已經差不多凌晨12點，可以選擇嘅食店亦唔多。我哋就隨便搵咗一間入去，因為太夜嘅關係，我都唔敢食得太多，只係叫咗一個熱鍋食。呢個有啲似係韓國嘅純豆腐鍋，有黃芽白、豆腐、金菇、兩片肉，雖然份量唔多，但咁夜先嚟食晚飯，呢個份量對我嚟講剛剛好。
沒有留言:
張貼留言