早餐過後，我哋先到淺草雷門寺。正所謂入屋叫人，入廟拜神，所以我哋都有入鄉隨俗，拜一拜神，潑一潑煙。嚟到淺草，唔食呢樣食物，我就會覺得無嚟過，就係人形燒。新鮮熱辣出爐嘅人形燒，裝住滿滿嘅豆沙餡，我會形容為人間美食。我哋買咗三包，有卅個，我有幸可以食到三個。。。yeah！！！
到過淺草後，我哋出發去築地食午餐。朝早嘅築地會人來人往，但下午已經變得稀落。朋友介紹嚟呢間築地青空三代目，幫小朋友叫咗一個火炙魚生飯，始終小朋友唔太適合食太多生嘅嘢，呢個魚生飯就啱佢哋喇。
屋企人就分別叫咗兩款唔同嘅雜錦壽司，望落個賣相都唔錯。
我同哥哥都叫咗呢個特上海鮮井，魚生同海膽都非常新鮮，隻牡丹蝦夠鮮甜，一啖殊落個蝦頭，一口都係蝦膏。食完呢餐魚生飯，真係大滿足。
食完午餐，就到咗小朋友時間。我哋去咗 Hello Kitty Land，我可以見到我喜愛嘅 Kuromi，但可惜佢嘅精品唔多，乜都買唔到。
Hello Kitty Land 後，我哋就出發去迪士尼樂園，但我哋今晚就放棄入迪士尼，因為大人們要去幕張 Outlet shopping。好可惜我哋到逹得太遲，每只可以主攻一間店舖購物。我去幕張 outlet 只有一個目的，就係 New Balance，因為之後去嘅御殿場 outlet 係無 NB 架！總算無失望而回，真係俾我買到一對波鞋，仲要係我喜愛嘅紫色。
Shopping 後我哋就隨便响幕張揀咗一間餐廳食晚飯，雖然係隨便揀，但佢嘅食物都唔差架！
嚟日本必食嘅一定係刺身，一共有六款刺身，分別係三文魚、吞拿魚、帶子、蝦、八爪魚同埋一款唔記得咗係乜。日本食刺身點都唔會太差，最起碼一定新鮮。
六款不同嘅串燒，第一次食煙肉串燒，係蘸埋旁邊個蛋汁一齊食。
我最鍾意呢味龍蝦汁意大利飯，意大利飯我唔鍾意食白汁，因為我總覺得不論白汁配意粉或飯都係偏漏，所以呢個龍蝦汁就 very good。每一粒飯都都被龍蝦汁包裹住，入口完全係龍蝦嘅味道。連我大姪大都話好味，食咗兩大碗。。。佢真識食！
對於呢個蕃茄火腿 pizza 我只係一般，可能因為我比較鍾意食厚底 pizza，所以對佢沒太大好感，但當然佢嘅味道都唔差，只不過唔係我個 pizza。
最後一味係蕃茄意大利冷麵，見到佢，我就會想起 Rasuperman 嘅蕃茄湯刨冰冷麵。
大家估吓我哋今日買得最多嘅係咩，係 evian 水！俾團友响淺草閒逛時發現，期間限定只賣100 yen，我哋即刻買咗十幾枝儲備。100 yen 即係大約港幣八元，抵到爛。但唔係部部汽水機都有架，要好彩撞正先會見到，證明我哋真好彩。
沒有留言:
張貼留言