蟹粉宴 @ 上海佬

對於一時令食物、生果，我特別鍾意，香蕉、蘋果、橙我唔好食，但荔枝、釋迦、榴槤、水晶梨、楊桃尤其喜愛。所以每年只得兩個月有得食大閘蟹亦特別鍾意，暫時最高記錄一年食14隻。。。都唔係好多！

每一年食大閘蟹我都會俾朋友鬧，因為佢鍾意食，但唔敢食多。但我偏偏就膽固醇偏低，所以我會好事無忌大咁食，仲要我個人本身熱底，就算一次過食4隻，唔飲薑茶都可以面不改容。

今年已經相約定幾個食友一齊去食大閘蟹，但仲有一個月先至有得食，感覺係漫漫長路。條蟲已經樹咬緊時候，點都要搵頂癮。湊巧上海佬推出蟹粉宴，正好可以餵條蟲。

曾經灣仔工作過好一段時間，而這條路亦係每朝返工必經位置，看著一間悠來已久夜總會搖身一變為一間上層係Karaoke店，而地下就係一間酒吧。但就從來無為意酒吧同Karaoke之中夾雜住一間上海同意大利食店。

 

上海粗炒、小籠麭、生煎麭、豆沙窩餅係我最熟識上海菜，但原來除這些之外，還有其他別出心裁食物，呢日有幸品嘗。



這個套餐有六個前菜可供選擇，分別有脆皮素鵝、陳醋雲耳、花雕酒醉雞、鎮江餚肉、蒜泥白肉、香烏芛。

 

 



第一次食香烏芛，亦係我較鍾意前菜之一。入口爽脆清甜，可以為之後食物帶一個清新感覺。

  

之後四道主菜，每一味都包含蟹粉在內。雞絲粉皮就食得多喇，蟹粉粉皮你又食過未？如果可以有更多蟹粉，好似雞絲粉皮麻醬咁，同粉皮完全混合埋一齊，咁就更加very good喇！



蟹粉流沙金棗，將蟹粉釀入墨魚球內，再將杏仁片舖墨魚球表面，如果你鍾意食杏仁的話，你一定會好鍾意食呢道菜，因為佢有好香濃杏仁味。我覺得佢唔單止表面有杏仁片，墨魚球內都混和杏仁汁一齊。

 

黃金白玉呢道菜真係好考廚師嘅刀功，將豆腐切到薄薄嘅一片，但又不能切爛，俾我唔知會切爛幾多磚豆腐都未會切到。



一口蟹粉千層麵係用 Lasagna 嘅概念去做，每一層都夾雜著蟹粉，真係可以話係啖啖蟹粉呀！



主菜過後，最後一味點心，就係望落有啲似春卷嘅蟹粉青瓜棒。



晚餐又點少得甜品作為了終止符號呢，食咗咁多道蟹粉，當然要食番一啲驅寒嘅甜品啦！一般都會食薑水湯圓，但這裡就用咗薑汁奶凍。其實又真係唔一定只可以食薑水湯圓，已經食到飽飽，都真係幾難再食碗湯圓薑水！