懷舊點心小菜夜 @ 八月芳

隨著時間嘅過去，每一樣嘢都要與時間並進，正所謂不進即退。雖然每樣嘢都要日新月異，但有時舊嘅總有佢嘅吸引之處，令人難以忘懷。就好似最近美心集團推出嘅懷舊點心、小菜，就會令人想起過去嘅點點滴滴。

每次去飲茶，見到有灌湯餃，我都一定會食。而家供應嘅灌湯餃通常都放於上湯中，但美心這款懷舊灌湯餃，就令我回想起細個食嘅灌湯餃係放在這種鐵片上，而湯就在餃子之內。薄薄嘅皮，內藏著熱燙嘅上湯，加上小許嘅浙醋，那種久違嘅味道回來了。

老家豉燒豬拖地 ~~ 第一次聽豬拖地這個名稱，佢係屬於豬嘅肥腩位置。雖然話係肥腩，但用佢做出嚟嘅叉燒，絕不肥膩，有入口即溶嘅感覺。

半新懷舊鴨腳包，真係好耐無食過鴨腳包喇！用鴨腸包著燒鴨、叉燒、鴨肝、鴨腳烤製，味道濃郁，齒甲留香。

古法瓦罉鹽甑雞，像雪一樣白嘅鹽，罩眼看就好像一隻雞被活埋在雪地一樣。嫩滑嘅鹽甑雞，就連雞胸都一樣係咁嫩滑。

懷舊五香紙包骨真的無咩地方可以有得食喇！因為而家改用咗牛油紙嘅關係，已經由骨改為用豬扒，但味道依舊無變，仍然味味不油膩。

蝦子鱔肚扒柚皮 ~~ 中秋過後，屋企就會用過節時嘅柚皮曬乾，做炆柚皮。中國人對每一樣食材都唔會浪費，都能利用做出別出心裁嘅美食。

茶居蔗汁糕 ~~ 爽口香甜嘅蔗汁糕，已難找了！

失傳豬油包 ~~ 細細個豬油包，份量剛剛好，食完都唔會覺太飽滯。

直至這個九月尾，大家都可以响各大美心集團酒樓回味一下過去嘅懷舊美食！