色香味 @ The Eight

每次去澳門，大部份人都只會考慮到捐窿捐罅通街搵嘢食，但你有諗過去酒店搵好嘢食呢？大家唔好有一個錯覺响酒店食嘢一定得個貴，但其實酒店都有好味兼抵食嘅食店，响新葡京嘅 The Eight 就係其中之一喇！佢嘅食物唔單止好味，仲唔係貴架！

環境優美嘅 The Eight，已經為食物加添分數。

 

 

先嚟三件佢哋出名嘅小點心，活靈活現鮮蝦金魚餃、皮薄香濃老陳皮雞汁小籠包、一吃難忘鮑魚燒賣皇、唔油唔膩脆卜卜金絲脆網叉燒卷

 

炸雞脾又太瘦，炸粉腸又粗得淨，到底係咩呢？原來係椒鹽田雞腿，隻田雞腿點可能可以咁肥美架？



過往我都好怕食東坡肉、獅子頭呢類餸菜，因為好怕食佢哋嘅肥豬肉，好似食咗擔豬油落肚咁，食兩啖已經覺得好膩唔想食。但今次呢味官燕獅子頭一啲都唔覺膩，仲有好清甜嘅感覺，唔單止獅子頭外有燕窩，連個頭裡面都釀咗燕窩。



柚皮水晶蝦球，蝦球係用咗馬來西亞嘅虎蝦，雖然係咁大個蝦球，但仍然係好爽，連柚皮都好滑。



厚切嘅蜜汁叉燒，肉厚但唔韌，味道剛剛好



琵琶糯米鴨加上咗檸檬汁嘅味道，令到正常食糯米時感覺溜嘅感覺減去，反而變得開胃咗

 

京式燒羊腩唔會因為炸過，肉而變得韌，仍然可以保持住皮脆肉嫩



三十年陳皮雞入口即時食到濃濃嘅陳皮香味，真係不槐為三十年陳皮

 

魚翅膏蟹鮮蝦荷葉飯，爆哂膏嘅膏蟹，再加上環保而換上嘅素翅，仍然有其打橫行嘅感覺



如煙似霧嘅砂窩鵝香荷葉飯給人一種夢幻嘅感覺，但入口絕不夢幻。十多種材料煮成嘅荷葉飯絕對係口感豐富

 

 

最後係椰子紅豆蛋糕同黑白芝麻布甸為甜品，作為總結。蛋糕內嘅紅豆係雪糕，絕對唔會太甜，黑白芝麻太極絕對同太極張三豐所畫嘅太極圈一樣咁真。