爆笑飲 Sake 夜 @ 香港遊艇會

我由幾時開始學識飲酒呢？無記錯的話，應該係大學 Year 1 開始，當時有個師兄响我間大學讀 MBA，係佢同另一個女同學教識我飲酒。。。吖，應該係話訓練到我識飲酒。當時响澳洲住嘅地方係一個好細嘅鎮仔，所以入夜後係無乜娛樂節目。食飯、睇戲唔會過10點，但最難得嘅係一個咁細嘅鎮仔竟然會有一間 casino。但唔賭錢嘅我，casino 對我嚟講係有等於無。

所以每個 weekend 我哋嘅活動就係去飲酒吹水，至此我就由一個滴酒不沾嘅人，變咗一個OK飲得嘅人。但今時今日嘅酒量已經不復當年勇，但都飲到幾杯嘅。

呢一晚係 sake dinner，顧明思義酒係今晚嘅主角，雖然係咁，但食物水準一啲都唔差，絕不馬敷。一坐下，我就欣賞桌上嘅壯觀場面，我嘅面前係七隻嘅酒杯，成弧形响我面前立正。我當時就諗，唔係有杯 sake 俾我飲呀？我聽朝仲使起身返工嘅？點知原來唔係七隻，係十隻，因為仲有三杯餐前酒未到。响一個咁優美嘅環境飲醉就唔係咁好啦，雖然以前係飲得多，一晚唔止飲十杯，但唔會超過五款唔同嘅酒囉！

 



三杯餐前酒，我比較鍾意柚子梅，可能因為鍾意飲梅酒嘅關係啦。。。對佢情有獨鍾。由左至右排列：京姬 柑熟 抽子梅；氣泡 日本酒 乾杯；京姬 柑熟 柚子檸檬

 

每一味菜係會配合唔同嘅酒，Ebi, Prawn and Gingko Salad, Assorted Chilli Peppers 配傳統辛口，呢杯酒唔太 strong 配前菜剛剛好

 

响澳洲成日都會食到嘅 Grilled Barramundi Fillet, Teriyaki Balsamic Sauce 配本釀造。雖然唔好食魚，但我又幾鍾意呢個 fillet，特別係塊皮有少少脆，好好味！

 

呢味係我全晚最鍾意嘅一味 Char-grilled Chicket, Roast Vegetables, Japanese Leek, Light Miso Sauce 配 純米。。。件雞係非常咁嫩滑，就好似 BB 一樣

 

Grilled Japanese Yamagata Pork Loin, M5 Wagyu Beef Tenderloin, Mentaiko, Natural Jus 配純米吟釀 & 純米大吟釀。

 

最後兩杯係我最鍾意嘅 Citrus Cream Mille-feuille, Yuzu Sorbet 配輕榨果子清酒 梅 & 輕榨果子清酒 柚子，特別鍾意梅酒。當飲過一啖柚子酒，之後再飲梅酒。。。清清嘅柚子令之後嘅梅味道更特出。