大鍋口海鮮火鍋店

有好一部份人都會覺得打邊爐只可以响冬天發生，夏天係唔適合打邊爐嘅，點解呢？有啲人嘅解釋係。。。夏天咁熱仲打邊爐，未熱過咩？開住冷氣打邊爐，嘥電兼嘥錢。

雖然我係一個超級發熱壓人，但就非常喜歡打邊爐。對於家庭人口少嘅我，响屋企打邊爐唔可以有太多食物嘅種類，每樣少少，就已經變得好多。但打邊爐種類少又會打得唔過癮，所以我鍾意出外打邊爐。人多就可以去啲唔係任食嘅打邊爐，始終質數好啲嘛！人少就一定係揀任食邊爐，每款份量嚟得唔多，可以揀好多唔同種類嘅食物。如果搵到間質數好，又係任食打邊爐咁就 very good 喇！

响一年多前已經聽聞過呢間火鍋店嘅材料靚，仲要係任食打邊爐。當時佢只得一間分店响荃灣，我試過提早一個星期去訂枱，都會同我講爆咗，所以一直都無機會去試。直至有日，只到有朋友嚟呢間打邊爐，佢同我講係响佐敦唔係荃灣，我先知原來佢响佐敦開咗分店。





$150左右任食任飲兩個半小時，絕對係夠哂時間你食同飲。雖然係任食火鍋，但材料一啲都唔差。今次揀咗這個蕃茄湯底，蕃茄味重，加湯亦都係加蕃茄湯而唔係加水，所以打到尾聲個湯仍然保持住好濃嘅蕃茄湯味。



粟米絕對唔係甩頭甩骨，碎濕濕。。。粒粒粟米都肥嘟嘟



任食都有海蝦可以俾你任食



丸都有多款俾你選擇，除咗一般嘅四寶丸外，仲有炙燒芝心丸、蟹粉包心丸等等





未見任食有咁靚嘅墨魚仔



除咗以上嘅食物外，肥牛亦係相當出色。但有一款食物一定要推介俾大家，可惜當晚掛住食無影到相。。。就係蟹爪捧肉，我平時係唔鍾意食打邊爐嘅蟹柳，因為入口只得個粉字，乜味都無。但佢這裡嘅蟹柳煮完係成絲狀，絕對係食完又想食。