舊友相聚 @ 星記海鮮飯店

這班朋友都有1年無見喇，每次飯局都好可惜未有空出席。難得今次遇著有空，當然要相聚一番啦！

今次攪手揀咗去灣仔嘅星記海鮮飯店，可能因為旺場嘅關係，我哋被安排咗响門口嘅位置，感覺上有啲怪怪。

先嚟佢哋出名生炒骨，炸得皮脆而不油膩，酸酸甜甜，絕對令人胃口大開！

蒜蓉粉絲蒸聖子，大大隻嘅聖子可惜有少少蒸過火，同埋加送大大粒嘅沙。

原本想叫佢哋嘅輝記蒸鹹雞，可惜已經售罄，最後只好改為鹽焗雞。雞肉嫩滑，但還是希望下次可以試下蒸鹹雞。

豉油王炒麵上枱時，已覺得賣相好像已炒好一陣子，食落亦發覺只得微溫，這個真的不太滿意。

煎藕餅煎得很香脆，亦唔會一咬即散。

最後一道梅菜蒸菜心，明明係第一輪已經點嘅菜，但到我哋食完都未上枱，懷疑應該係漏單了，但慶幸侍應們不斷幫我哋追單，終於上枱了。

不用什麽配料，夾著梅菜嘅香味，又不會過鹹，蒸後嘅菜心仍然保持爽口。

最後送上我喜愛嘅清爽馬碲爽！